अमेरिकी राष्ट्रपति डोनाल्ड ट्रम्पले आफ्नो प्रशासनमा आक्रामक फेरबदल सुरु गरेका छन्। यसै क्रममा राष्ट्रपति ट्रम्पले आफ्ना कट्टर समर्थक एवं महान्यायाधिवक्ता पाम बोन्डीलाई पदबाट हटाएका छन्। ट्रुथ सोसलमार्फत घोषणा गर्दै ट्रम्पले बोन्डीको स्थानमा उनका पूर्व उपमहान्यायाधिवक्ता टोड ब्लान्चलाई नियुक्त गर्ने निर्णय लिएका हुन्।
लामो समयदेखि ट्रम्पकी विश्वासपात्र मानिएकी बोन्डी, गृह सुरक्षा प्रमुख क्रिस्टी नोमपछि पदमुक्त हुने दोस्रो उच्च अधिकारी बनेकी छिन्। पदबाट हटेपछि प्रतिक्रिया दिँदै बोन्डीले महान्यायाधिवक्ताका रूपमा सेवा गर्न पाउनुलाई ‘जीवनकै ठूलो सम्मान’ भनेकी छिन्। उनले अब आफ्नो जिम्मेवारी ब्लान्चलाई हस्तान्तरण गर्ने र निजी क्षेत्रमा रहेर पनि ट्रम्प प्रशासनका एजेन्डालाई सहयोग गरिरहने प्रतिबद्धता व्यक्त गरेकी छिन्।
रक्षा विभागमा पनि खैलाबैला: सेना प्रमुखको राजीनामा राजनीतिक नियुक्तिसँगै पेन्टागन (रक्षा मन्त्रालय) मा पनि ठूलो हलचल देखिएको छ। इरानसँगको तनावपूर्ण सैन्य द्वन्द्वकै बीच रक्षामन्त्री पिट हेगसेथले आर्मी चिफ अफ स्टाफ जनरल र्यान्डी जर्जसँग राजीनामा मागेका छन्। पेन्टागनका प्रवक्ता सिन पार्नेलले जर्ज ४१ औं चिफ अफ स्टाफको पदबाट निवृत्त हुन लागेको पुष्टि गरेका छन्।
सन् २०२३ मा पूर्व राष्ट्रपति जो बाइडेनद्वारा नियुक्त जनरल जर्जको कार्यकाल ४ वर्षको भए पनि उनलाई समयअगावै पद छाड्न दबाब दिइएको हो। रक्षा विभागका एक वरिष्ठ अधिकारीले “नेतृत्व परिवर्तनको समय आइसकेको” बताए पनि जर्जसँग राजीनामा माग्नुको ठोस कारण भने खुलाइएको छैन। वेस्ट प्वाइन्ट मिलिट्री एकाडेमीका उत्पादन जर्जले खाडी युद्धदेखि इराक र अफगानिस्तानको सैन्य मोर्चामा महत्त्वपूर्ण भूमिका निर्वाह गरेका थिए।
जनरल जर्जको बहिर्गमनसँगै अब आर्मी भाइस चिफ अफ स्टाफ जनरल क्रिस्टोफर ला–नेभले कार्यवाहक आर्मी चिफको जिम्मेवारी सम्हाल्ने अमेरिकी सञ्चारमाध्यमहरूले जनाएका छन्। इरानसँगको जारी युद्धका बीच सेनाको नेतृत्व परिवर्तन हुनुलाई रणनीतिक रूपमा निकै अर्थपूर्ण र संवेदनशील मानिएको छ। ट्रम्पले आफ्ना नीतिहरूसँग पूर्ण सहमत हुने अधिकारीहरूलाई मात्र प्रशासनमा राख्ने रणनीति लिएको यस कदमले स्पष्ट पारेको छ।
